لمى ،

بداية حماسية كالعادة ،

على طول طبينا باختبارات !

السبت اختبرنا رياضيات ، أخذت 9,25

عجزت أستوعب أني بديت ههههههههههههه ..

بس أن شاء الله أنها العثرة قبل القفزة :p

الاحد فيزياء ، مدري كم بآخذ بس أني خبصت تخبيص ..

الأسئلة كانت عجيبة وموب اسلوب الاستاذة ، يعني هذي الاستاذة تدقق على المسائل وكل اختباراتنا الترم الأول مسائل ،

فجأة صار كل الاختبار وحدات واجهزة ومصطلحات !

عجيب بصراحة ،

الاثنين كيمياء ، أن شاء الله كامل مرة حليت زين الحمدلله ..

الثلاثاء كان مفروض نختبر انجليزي بس لسه ما خلصنا اليونت فأجلته عقب ..

الاربعاء () أزين يوم بالدنيا ههههههههههه .

كان مفروض نختبر أحياء وبرضو أنلغى لأن عندنا تكريم ()

الله ما أحلى شعور التكريم ههههههههههه ..

بس جد حلو يكرمونك وهكذا : ]

وأمك مستانسة : ]

وأنت مستانس : ]

مدري ليش دائما أحس التكريم طيحة ههههههههههه ..

دايم أحس الي يتكرمون بيطيحون مدري وش السبب بصراحة : ]

خفت أطيح بس أشوى ما طحت هههههههههههههههههه ..

بعدين لما طلعنا ،

وريت أمي أستاذة الأحياء ، طبعا أمي المستوى بقريح أهم شيء الأخلاق

تقولها كيف سلوك لمى ؟

والأستاذة تمدح وتمدح وتمدح وتمدح وانا سعيدة وامي خقت ههههههههههه ..

ووريتها استاذة الفيزياء ،

نفس الشيء :]

كنت أبي أوريها أستاذة الرياضيات أكثر شيء أحسها بتمدح بحماس وصدق هههههه ـ

أستاذة الرياضيات تحسني الفتاة الي مدري شلون ،

بس مالقيتها حسافة :]

أمي أستانست ع المدرسة وعلى البنات مرررة ،

بس عيت تعترف أنها أحسن من 32

 

وماذا حصل أيضا ،

ايه بنت تقولي وحنا جالسين في المسرح :

صراحة يوم قالوا لي صديقاتي أنك من الاوائل ما صدقت

تقول مو شكلك مو شكلك أبدددددددددد ..

كاك كاك كاك ن2

هي كانت جنبي بالقاعة ايام الاختبارات ،

ليش الناس ما تعترف أني شاطرة ؟

،

ووحدة معي بالفصل يوم قلت لها نسبتي طلعت عيونها برضو تقول مو شكلي ..

بس عادي ههههههه كذا العباقرة

 

فجأة خلص الاسبوع الثاني .. وفجأة بيخلص الترم ،

وفجأة بندخل جامعة ،

الأيام تركض

 

يا ألهي ،

هل تعلم انني كتبت تدوينة طويلة عريضة كلها سواليف لكنها طارت في الهواء < الله من الشلخ ..

قررت اشياء كثيرة بسويها هذا الترم :

أولا بنحف هاها ،

ودي يتغير شكلي نوعا ما ..

ثانيا ما تنقص نسبتي وتزيد بإذن الله ,..

وبما أنني العام زاد الترم الثاني عن الترم الأول 4 درجات ..

بإذن الله بتزيد هذا الترم عن الترم الثاني 4 درجات ..

يعني ما راح أنقص ابد ابد يارب يارب

* درجة الأنجليزي تنضرب في 4 ..

ممم وش بعد ،

ايه قررت اتعلم أنجليزي وصرت أتكلم قليلا أنجليزي ع المسن لأنه شيء مفيد وقسم ..

بس إذا صارت السالفة حماسية قلبت عربي هع هع ،

وقررت ما اقص شعري عشان امي الجوهرة ()

 

وماذا أيضا ،

 

أحسن شيء يوم الاربعاء مسوين نفسنا العباقرة وبنسوي تجربة تحضير الكلور ،

طبعا الاستاذة طول ما هي تشرح لنا الدرس تقول غاز الكلور سام والي يستنشقه يموت فوراً ،

وبنحضره

المهم يوم بدت حطت قارورة

وبتسخنها لين يطلع الكلور ،

قالت لنا بس تشوفون لون أخضر أطلعوا لأنه خطر ومروعتنا حتى الموت ..

المهم شغلت النار ودخلته تحت شيء عشان ما يطلع علينا ومسويين حركات

وحنا نترقب خروج اللون الأحضر ومتحمسين

أنكسرت القارورة ، ما أدري وش صار بعد ذلك بس أني فجأة صرت برا المختبر هههههههه ..

والله يا إن الأنسان يخاف من الموت ..

 

وش بعد ؟

اييييه رجعت الأذاعة وأخيرا ..

الا على طاري رجعة الأذاعة هو أنفلونزا الخنازير ذهب للجحيم ولا وش صار عليه ؟ معد له طاري ؟

المهم ان أول يوم بالأذاعة أنا ومنال صافين أوائل :p

سعادة الإذاعة تحسسسنا بمعنى الطفش المدرسي وعدم وجود سالفة ..

 

وصاروا  يقفلون الفصول بأمر من الوزارة الفاضلة ، مدري وش الحكمة من ذلك بس أزين هاهاها ..

أخبر 32 من الفصل الأول يقفلونها .. كنت احسب صاير مشكلة عويصة فيها بس الظاهر أمر وزاري وأسرع من نفذه 32 بسم الله ما شاء الله :p

 

أنتهت سواليفي حفظني الله ،

ترم عامر بالتوفيق والنجاح والأجتهاد ..

 

إلى كل غير مجتهد :

والله طعم الهبالة والتنطنيش حلو ،

بس روعة أنك تمسك شهادتك ودرجاتك حلوة أحلى وأحلى وأحلى وأحلى …

 

السلام عليكم ،

أهلا مدونتي وسكان مدونتي الأحباء ..

من زمان عنكم () < وش عندي أكلم الهواء : ]

اليوم كانت بداية الترم الثاني من ثالث ثانوي = الترم الأخير ..

وأخيرا بدينا الترم السادس ..

باقي أربع شهور بس وخلاص نودع المراييل وجو الدراسة () وندخل عالم جديد تماما !

 

بقول لكم كيف كانت اختباراتي ،

السبت 15 / 2 / 1431 هـ ..

كان رياضيات طبعا ،

جلست أذاكره من يوم الأحد وحتّى الجمعة ,

مذاكرته ما كانت صعبة ،

لأن المنهج الحمدلله تماماً فاهمته ،

بس الرياضيات كثير فيبغاله وقت وتركيز ..

والحمدلله أختباره كان من أروع ما يكون !

 

الأحد 16 / 2 :

كان أدب ،

أتذكر كنت متساهلته ومعتبرته ما أحلاه ،

مع أنه مو بهالسهولة ، أسماءه واجد ويبغالها حفظ ..

تعبت لأني تمططت في البداية وضاع الوقت ، بس الحمدلله أختبرت وحليت زين ()

 

الأثنين 17 / 2 :

كان أحياء ..

كنت مخلصة فصلين قبل الاختبارت فالحمدلله ما كان صعب ،

وخلصته بدري ،

وأساساً شرح الاستاذة أحسّه يحفظني .. يعني وأنا أذاكر كأني حافظته ، الحمدلله خلصت بدري ..

ولمّا جيت المدرسة الصباح ، البنات يقولون مواصلين ومتوترين وحالتهم حالة .. شكيت في نفسي هههههه يمكني ناقزة فصل ولا ناسيته ..

بنفس اليوم جت عندي أستاذة الرياضيات قالت لمى أبشرك بشارة ؟

قلت 30 ؟؟

قالت ايه وبسم الله عليك ووو …

بوقت الاختبار أحسني ودي أنقز من الكرسي هههههههههههه ..

الحمدلله ،

 

الثلاثاء 18 / 2 :

أنجليزي !

طبعا عقدتي الجميلة ، طول اليوم مدري وش أسوي ههههههههههه

وصياح وحالة مزعجة ، أكثر مادة تعبت فيها ..

طبعا كنت مخلصة ترجمة كل شيء ، وحافظة التعابير ، تقريباً ما بقى لي ألا القرمر و الرايتنق وأحفظ الكلمات ..

بس أنجليزي همّه يبهذلني ..

يوم رحت المدرسة البنات يقولون ذاكرنا حاسب – كان من بكرة حاسب وحديث سوى – هههههههه

طبعا كل واحد ونقطة ضعفه .. أنا نقطة ضعفي الأنجليزي . بس عدّى الحمدلله

 

الاربعاء 19 / 2 :

حديث وحاسب ،

خفيفين دم وحليلين هههههههه الحاسب بعض البنات يعتبرونه صعب لأنه شيء جديد وبرمجة ووو ..

بس بالنسبة لي مادة ممتعة ()

 

السبت 22 / 2 :

كان فيزياء ..

طبعا شايليين همه ومزعجنا ووو … مذاكرته ثقيلة دم مع أني فاهمة كل شيء مع الاستاذة الحمدلله .

ولمّا جاء الاختبار ..

كانت الأسئلة سهلة بطريقة غريبة ،

يعني لمّا تركز ع الأشياء الصعبة وتتوقع أشياء بتجي .. وتجيك شيء ثاني ،

كانت سهلة سهلة سهلة ، بس بطريقة غريبة ..

 

الأحد 23 / 2 :

كان فقه ،

أخف دم مخلوق في العالم هههههههههههه ..

أنواع الروقان مذاكرته ()

 

الأثنين 24 / 2 :

كان كيمياء ،

قبل الاختبارات ذاكرته كلللله ..

لأنه أولاً الاسبوع الثاني ،

وثانياً مو مادة سهلة أبدا .. خاصة على آخر الاختبارات تحسين خلاص أنهد حيلك ..

بس الحمدلله وقت مذاكرته بنفس اليوم أحسني حافظة كل شيء مع اني متوقعة بنسى مذاكرتي لأنه بعيد يعني بس الحمدلله ..

 

الثلاثاء : كان نحو ،

لعبت لعب وانهبلت أنهبال هههههههههههه

بالنهاية ذاكرت يعني بس عقب ما جاني النوم خخخ

بس الحمدلله

 

الاربعاااااااااااااااااااااااااااااااء :

كان توحيد ..

طبعا زي كل آخر يوم الواحد تجيه حالة نفسية غريبة هههههههه ،

بس الحمدلله ،

 

يوم الخميس دقت علي منال صوتها منصدم نفسيا وحالته حالة هههههههه

تقول لممممممى، نزلت النتايج بس غلللط

أتوقع غلط مستحيل صح طلع لي 95 %

والتوحيد ما نزل

قلت لها عشان التوحيد ما نزل بس نقدر نحسب نسبنا بفرض أن التوحيد 30 < ثقة هههههههه ..

 

دخلت موقع الرواد وأشوف درجاتي ،

كلها كاملة وأنزل أنزل ،

نقصت بالأنجليزي درجة ، بس ..

الباقي كامل

والنسبة طالعة 95 %

طبعا ما أنحسبت تراكمي عشان كذا اثر التوحيد ..

طبعا شفتها وحسبتها بفرض أن المجموع الكلي 1750

طلعت لي 99.77 %

وأروح أبشّر أمي وواو ومبسوطين هههههه ..

وأدق على أبوي ووو .. حماس يعني

طبعا ما أنسى أقول أني دقيت على أمي الجوهرة أبشرها

أمي الجوهرة اكثر أنسان متفاعل معي في الاختبارات ومتحمسة وبس ناشبة بحلقها أنا أدعي لي أجيب 100 % هههههه ..

دقيت وبشرتها وأستانست ()

أقولها كم تتوقعين جبت ؟

تقول ميه من ميه ههههههههههه ..

هذا كان يوم الخميس ،

يمكن ما جاء المغرب ألا شالوا النتايج

وش السالفة ما ندري : ]

ارسلت لهم ايميل ، قلت انو النتايج الي طلعت يوم الخميس صحيحة أو لا ؟!

ردوا قالوا لا غير صحيحة لأن الدرجات ما أنرصدت أساساً ..

أنهرت نفسيا هههههههههه …

وشو وأنا بشرت خلق الله بعدين تطلع غلط لا مستحيل : P

يوم الأحد أرسلت لي منال أنو ترااها طلعت ..

دخلت نفس الشيء ما تغيرت النتايج بس أضافوا التوحيد وصارت النسبة صحيحة ..

صارت نسبتي 99.76 %

لأن الرياضيات صار بـ 6 حصص ،

والأدب كان باعتقادي أنه بـ حصتين وطلع بحصة ،

عموما ما تغيرت واجد الحمدلله ..

 

قبل فترة حطيت في نكي في المسن ، ” الهدف : 98.6 % “

طبعا الناس محيرتهم الـ 6 هذي هههههههه ,,

هو العام كانت نسبتي 95,4 %

فعشان أجيب فوق 97 % لازم تكون نسبتي فوق 98.6 %

الحمدلله جبت نسبة ما كنت متوقعتها ،

كلّه بتوفيق ربي ،

 

بس من العام أكتشفت شيء ،

أنّ الأنسان لمّا يحط براسه شيء بيقدر يجيبه ، ويجيب أعلى منه ..

العام قلت لو جبت نسبة أقل من 95 % بنقل ،

وكنت اشوف 95 مرة شيء حلو ،

جبتها الحمدلله وجبت أعلى منها ..

الحين أنا أشوف 95 شيء قليل ،

 

فكل ما ارتفعت همّتنا .. راح نلقى نتايج أعلى ،

هدفي لهذا الترم ما تنقص نسبتي عن الترم الي راح ، وبإذن الله راح ترتفع ..

وأتمنّى من قلبي ..

اختبار الأنجليزي يصير أسهل أختبار عليّ ،

وأطلع منه وأنا متأكدة تماماً من أجاباتي ..

 

 

أتمنّى للجميع التوفيق ، ونتايج ترضيهم يارب ()

الحمدلله ()

خلصنا وأخييييييييييييييييييييييرا ()

بعد ثلاثة اسابيع كاملة من الكرف المتواصل ،

السبت كان عندنا رياضيات ،

الحمدلله الاختبار كان مريح ، بعد أسبوع مذاكرة كامل ،

بس طبعا تعرفون الرياضيات مهما حليت ماتدرين حليتي زين أو لأ ،

الاحد كان أدب ،

تعبني نفسيا صراحة ، بحكم أني دايم أنقص فيه على غير سنع ، وبكثرة الأسماء حاقتهم أزعجججني ..

بس الحمدلله الاختبار كان زين ،

 

الاثنين كان أحياء ،

قبل لا أدخل الاختبار جت استاذة الرياضيات عندي ،

قالت أبشرك بشارة بس ما تعلمين أحد ؟

قلت بشششششري 30 ؟ قالت بسم الله ما شاء الله ومدري وشو ،

طبعا حلقت في الفضاء من السعادة :p

باختبار الاحياء كذا أحسني موب طبيعية ،

يعني الرياضيات بسبع حصص ، ضمنت شيء كبير من المعدل ..

الاحياء ما كان سيء ، ومذاكرته مرة مريحة ..

الحمدلله ،

الثلاثاء العقدة النفسية : الأنجليزي ،

طبعا منب قايلة أني صحت ليلة اختباره ههههههههههههه ،

سبب لي تعاسة عظيمة بصراحة !

بس الحمدلله الاختبار حلو < تلاحظون أني بديت أفقش ؟

يعني هو أسوأ أختبار بالنسبة لاختباراتي ، بس ما أضمن الأنجليزي ..

 

الاربعاء حاسب وحديث ، مرة حلوين والحمدلله ،

السبت الثاني كان فيزياء ،

مذاكرته مزعجة ومنرفزة وتعبني كثير

والأسئلة جت غريبة عجيبة ،

من كثر ما هي سهلة تحسين نفسك ضعتي فيها ..

يعني تصوري أنك جالسة طول الوقت ع المسائل الي فيها أفكار ،

وعلى أشياء الي تعتبرينها مهمة وممكن تجي ،

وفجأة يجيك أختبار كل مسائله تعويض مباشر ،

ومدري شلون بصراحة ،

بس الحمدلله حليت يعني … بس حسيت نفسي ضيعت الوقت وتعبت ،

الأحد فقه ،

أنواع الاجازة والفلة والخبال ههههههههه ..

الأثنين كيمياء ( النهاية الصغرى للاختبارات )

الحمدلله الكيمياء ختمته قبل الاختبارات

فيوم الاختبار كأني أراجع الحمدلله ،

والاختبار كان حلو ،

الثلاثاء نحو ، انهبلت وما ذاكرته زين كالعادة ، بس على آخر الوقت مسكته قلت ما يسوى علي على آخر يومين أخربها وانا متعبة نفسي طول الأيام الي راحت ،

الاربعاء توحيد ،

من جد يوم التوحيد كأني عطلت بحماس بعد ،

والحمدلله خلصنا أخيراااااااااااااااااااااً …

نتايجنا بتطلع بكرة ( الخميس )

أذا طلعت وقتها بحس نفسي من جد عطلت :” ..

 

الله يرضيني بما كتب لي ()

 

يا سرعها أيام ثالث تمشي ،

خلصنا الترم الأول تقريبا وما بقى غير اسبوع مراجعة + أسبوع نغيب نذاكر + أسبوعين الاختبارات ..

ايامها تركض تركض تركض ! ..

السبت اختبرنا رياضيات كالعادة :]

اختباري هذا مرة حلو إن شاء الله عشرة ..

الاحد وش صار ،

أختبرنا نحو ، وتوحيد .

النحو حلو الحمدلله ،

التوحيد صرقعت صرقعة ههههههههههه

مثال على الطيرة : رجل سمع كلمة ضعيف فتشائم في اختباره ،

مثال الفأل : رجل سمع كلمة ممتاز فتفائل في اختباره :]

خخخخ ،

الاثنين وش سوينا ،

نسيت ،

الثلاثاء كان اختبار عملي حاسب ..

خبالة الاستاذة راجعت لنا المسألة الي بتجينا بعد شوي بالاختبار ، الله ما أبهانا :]

الاربعاء اختبرنا فقه ، وأدب ، الحمدلله حلوين ..

وش صار شيء غريب هالاسبوع !؟

ما صار شيء غريب ،

بس متخلفين بهالمدرسة

للحين بس باقي لنا بالأحياء فصل وزيادة ،

والفيزياء فصل ،

والكيمياء فصل ،

والرياضيات 3 دروس ،

محد خلص المنهج ،

مرة بطيئيييييييييين ،

الترم هذا مرة قصير بالنسبة للعام ، أتوقع هذا له دور ..

بس صراحة الاستاذات بطئ ،

أجل كل المواد العلمية زيادة حصة + ما يغيبون أبد بس الفيزياء واجد غيابها ..

وعلى هذا كله للحين ما خلصنا ،

والله من البرود :]

 

الحين بديت أذاكر ، عشان أجيب نسبة كويسة ..

حطيت نسبة ببالي وإن شاء الله وبتوفيقه بجيب أعلى منها ..

98.6 %
الله ييسر ..

 

دعواتكم اليوم آخر يوم نتيّ :]

كل ما دعيتوا لانفسكم أدعوا لنا :]

والله يوفق الجميع ..

ماصدق سرعة الأيام ..

السبت أختبرنا رياضيات كالعادة !

الأحد سوينا حفلة مع الفصل الجميل ،

يسمع بالحفلات فصلنا

قبيح جدا ، شلل متفرقة ومابينهم أي علاقات ..

جلسنا مع بعض ، بعض البنات اصلا ما جوا

وكل ناس يسولفون لحالهم ..

أهم شيء جمانة  ” هذا المقطع طلبت جمانة أمسحه  > كأن أحد بيقرا التدوينة غيرها :] “  هههههههههه ..

وتقى بعد ، انشودتها خطيرة عجبتني

الاثنين الي هو الاربعاء المصغّر

اختبرنا كيمياء ، أن شاء الله آخذ عشرة كاملة ()

الثلاثاء سووا لنا محاظرة مرة تجنن عن العفو ..

أنسجمت معها مع أني كنت بردانة وجمدانة إلى آخر حد وأبي نسكافيه ،

كانت تتكلم عن العفو ، مرة أشياء تجنن ()

يارب أقدر أطبقها ..

الاربعاء الي هو اليوم ،

أختبرت انجليزي ، كاك عقب العشرات الي بدون اضافي فجأة نص الفراغات ماحليتها ..

لأني ما ذاكرت وش أسوي

كان مفروض نختبره أمس ، بس طارت حصة الانجليزي مع المحاظرة ،

واختبرت أحياء ، الحمدلله مرة زين بس فيه خطأ .

مرة حسافة ، بس كذا مدري ليش جاوبت خطأ

يالله قدر الله :]

 

اليوم بعد ما دخلنا بعد الفسحة

لقينا ناس غرباء بفصلنا ، وحايسين أبو الفصل ،

وهذاك الشيء الي ينفقع ويطلع أوراق مسوينه ،

وفصلنا كله أوراق ومقرف شكله ،

طبعا منال القوية هاوشتهم أحسن يستاهلون ،

وكل ما دخلت علينا استاذة تجلس تطالع فينا وتقل ما اعجبناها بعدين نشرح لها الموضوع وإن مالنا دخل :” ..

 

المهم أنهم قليلات أدب وما يستحون ،

 

في سالفة تضحك

الآنسة جمانة ما تقدر تداوم إلا بجوالها ،

تخاف تضيع مثلاً أو يسرقها وهيب ..

طبعا هو جوالها قدرات خارقة ، بس تدق على 999 تطيح قنبلة على أي شخص يحاول يسرقها أو أي شيء ، كذا هو مبرمج جربوه اختراع قوي صراحة ،

المهم أن يوم الاثنين

دخلت المراقبة مدري المشرفة التعليمية :]

قالت بناات ، حطوا شناطكم ع الطاولة وعباياتكم ،

وجمانة أول شخص قدام الباب / يعني هي الي بتبدا فيها  ،

وتجلس لمى وش الواجب ؟

ويدها بشنطتها خخخ .

وحطته بجيبها وفتشت الاستاذة شنطتها وانتهت هذي السالفة ونجت الحمدلله

يوم الثلاثاء بحصة الحاسب ،

الاستاذة تشرح ومتحمسين ..

فجأة شيء ” قرآآني …. ”

يا عيني ، رن جوالها خخخخخخ بس الحمدلله محد انتبه

والله يا قلبي مادري أين ذهب ..

 

ولا زالت مصرة ما تداوم إلا بهذا البطل المغوار ن2 ..

 

مع السلامة ()

أخيرا صار عندي سواليف حقة أسبوع ، هذا الاسبوع طويل وقصير مدري شلون أوصفه ، كأني أمس كاتبة تدوينة الاسبوع العاشر ..

بس اذا تذكرت متى حفلة الفصل احسها يا بعدها خخخ ..

أسبوع الاجازة ،

مرة فاضي .. < عشان الاثنين والثلاثاء ماعندنا اختبار خخخخ ..

الأيام تمشي بسرعة ،

وشدييدة التشابه ..

الله يسعد أيام ثالث ويطولها على خير ..

ويحفر في قلوبنا ذكريات ما تنسي عن ثالث _ حلوة طبعا _ ..

 

* اليوم رحت بشرى ، وشفت بنات 32 ..

وحمدت ربي أني ما صرت أشوفهم كل صباح :]

 

بسم الله الرحمن الرحيم : ]

هذا الاسبوع التاسع من ثالث ثانوي الي تركض ركض ..

مع أني أحس أول يوم بعيد خخخ ..

عموما الحمدلله على هذه السعادة () ،

السبت كان عندنا اختبار رياضيات ، مرة كويس .. أن شاء الله عشرة ()

الأحد فيزياء . برضو سعييييييد ان شاء الله بعد عشرة ..

الاثنين كيمياء .. يعني حليو خخخ ..

الثلاثاء انجلييييييييزيييييييييييييييييييييييييييييييييييي ..

أخذذذذذذذذذذذذذذذذذذذت العشرة رقم 2 بدون اضاففففففففي أيضااااااااااا ,.. والله ياهي سعيدة عشرة الانجليزي ، والله يا أنا أحس بأكبر انجاز بحياتي هههههههههههه ..

الحمدلله ،

الإربعاء ..

الي هو اليوم أحياء ، مرة حلو ..

يعني مذاكرتي كانت مشي حالك خخخ ..

وش صار مواقف بهالأسبوع خ1 ..

الثلاثاء سويت قهوة بيدي الكريمتين هع هع ،

بس ما شربت منها هع هع ،

منال تقول انها لذيذة ، لكني لا أرى ان لونها اصفر < هو القهوة الي لونها أصفر حسب معلوماتي هي ازين قهوة بالعالم خخخ ..

وجبنا فطور اليوم خ1 ،

وصرنا شلة على قولة جمانة خخخخخ .. امنيتها التي لم تتحقق بعد :p

 

 

 

وبس :]

 

في مثل هذا الوقت من 18 سنة كانت امي بالطريق للمستشفى ..

وولدتني الساعة 2 ، بعد معاناة خخخ ..

وكان عمرها 18 سنة !

1413 هـ

1431 هـ ..

 

()

 

 

* اتمنى من قلبي .. تتذكر هذا اليوم مثل ما عديت لميلادك .. !

 

أيام ثالث صارت تركض ركض ..

وأسرع من السرعة على قولة أبلة الأحياء .. :]

 

السبت اختبرنا رياضيات :] أخذت عشرة بسم الله ما شاء الله ههههههههههههه ..

أبلة الرياضيات أحسها تتحير من أمري :]

مرة 10 ومرة 6 وربع خخخ

عدت الاختبار المدري كم ، لأن درجتي فيه مخيسة :] وحليت حلو نوعا ما مع بعض من التأليف والتصريف والنصب والشلخ خخ

بس أن شاء الله تصدق أني فاهمة وأجيب عشرة ، صدفة مثلاً :]

الاحد اختبرنا توحيد ونحو ،

الحمدلله مو سيئات يعني ، بس ما أتوقع عشرة ..

مع أني بما اني اخذت 10 بالأنقليزي وبدون أضافي صارت تطيح من عيني أنقص ربع درجة بباقي المواد < يقلع ام الذل صح أزعجتكم بعشرتي الي أخذتها ؟

طيب شسوي فرحانة :]

الاثنين أختبرنا حديث .. أخذت عشرة الحمدلله ،

الثلاثاء فيزياء ، حلي مرة حلو .. أن شاء الله عشرة :]

الاربعاء الي هو اليوم اختبرت أدب مخيس كالعادة ..

درجاتي بالمواد العلمية مرة زينة ، وتجي الأدبية تخسف نسبتي ع4

مفروض يحطون قسم علمي خالص ، للأذكياء أمثالي :]

وقسم أدبي خالص ، وقسم مختلط :]

ان شاء الله لو صرت يوما ما وزيرة التعليم مثلا أو منصب كبير راح يكون التقسيم كذا .. بس عطوني آرائكم ؟ مو فكرة حلوة !

 

أحسن صدفة بالدنيا ،

فجأة الفجئات هههههههههههه

عندنا استاذة الدين ( حديث وقرآن )

دايم إذا ضحكت اتذكر أ. وفاء (L)

وأقول لجمانة ومنال ما يصدقوني ، والله زي ضحكتها ..

المهم ذاك اليوم تمشي .. وأقول لجمانة شوفي مشيتها تشبه أ, وفاء وقسم (L)

عاد اليوم بحصة القران تعلمنا كيف نقرأ آية طويلة بنفس واحد ،

وكيف إن إستاذتها علمتها وووو …

وتمدح أستااذتها وهكذا ..

بعدين قالت الله يجزاها عنّي كل خير أ, وفاء الـ ….

أنا وجمانة طلعت عيوننا مواهاهاهاهاها

عرفت سر الشبه ، هذا الشبل من ذاك الأسد (L)

 

عاد ومن هذا المنبر ()

أقول أني اشتقت لحصص أ. وفاء شوق عظيم لا تصفه الكلمات ,.

تعالي درسينا صبح مساء والله ما أمل ولا شيء

أنا حزينة أبغا أ. وفاء ..

بنات 14 ، ممكن سلف ؟

 

قبل كم يوم قالوا لنا أن فيه اجتماع امهات يوم الاربعاء

ووزعوا علينا اوراق وهكذا ،

المهم بالموضوع ..

أعطونا اوراق مكتوب عليها ، موعد اللقاء من 6 ألى 8 ونص ,,

وحنا محتارين يالله 6 ما بعد بدى دوامنا وما بعد طلعت الشمس من بطن الأرض ، كيف ذلك ؟

ومحتارين ويالله كيف كيف ؟

عاد أنا أحلل تحليل ذكي مرة ،

التحليل يقول : أنهم كاتبين من 6 لين 8 ونص عشان الامهات يجون بدري لانهم متعودين الامهات يجون متأخر ياللعار

المهم

يوم رجعت البيت أراجع الورقة أراجع أراجع خخخ

كاتبين تحت .

نرجو عدم حضور الطالبات والأطفال ؟

يالله حيرني هذا الأمر .. يعني ما نداوم الاربعاء ؟

 

المهم بالموضوع .. انتبهت أخيرا لكلمة .. مساء هاهاهاها

يا حياتي يا حنا ما تعودنا هههههههههههههههههه